საქართველოს 27- ე ეროვნული ჩემპიონატის, უმაღლესი ლიგის მერვე ტურის შეხვედრას დინამო თბილისი ქუთაისის ტორპედოს წინააღმდეგ გამართავს. ქართული დერბი ქუთაისის რამაზ შენგელიას სახელობის სტადიონზე 15.00 საათზე დაიწყება. დაპირისპირების პირდაპირ ეთერს ტელეკომპანია რიონი შემოგთავაზებთ. ჩვენი კლუბის ოფიციალური ვებ-გვერდი ტრადიციულად მატჩის როგორც ტექსტურ, ასევე ვიდეო რეპორტაჟს წარმოგიდგენთ.
ჩვენი მეტოქე
ქუთაისის საფეხბურთო კლუბი ტორპედო 1946 წელს დაარსდა. ტორპედო საშინაო შეხვედრებს ქუთაისში რამაზ შენგელიას სახელობის სტადიონზე მართავს, რომელიც 19 400 მაყურებელს იტევს. ქუთაისური კლუბის სიმბოლიკა ძირითადად შავ და თეთრ ფერებში არის გადაწყვეტილი. ტორპედომ პირველ სერიოზულ წარმატებას დაარსებიდან სამი წლის თავზე მიაღწია, ტორპედო იმჟამინდელი საქართველოს ჩემპიონატის გამარჯვებული გახდა. ჩვენი მომავალი მეტოქე 1960 წლიდან – 1962 წლამდე სსრკ ჩემპიონატის ბ ლიგაში ასპარეზობდნენ. სსრკ პირველობის უმაღლეს ლიგაში ტორპედომ პირველი ოფიციალური მატჩი 1962 წლის 2 მაისს საკუთარ მოედანზე გამართა. სადებიუტო შეხვედრაში ქუთაისელმა ფეხბურთელებმა მოსკოველი თანაკლუბელები ანგარიშით – 5:1 დაამარცხეს. 1963 წლის 15 აპრილი ქუთაისის ცენტრალური სტადიონისთვის ისტორიული თარიღია, ამ დღეს ერთმანეთს ქუთაისის ტორპედო და დინამო თბილისი დაუპირისპირდნენ, შეხვედრა გატანილი გოლების გარეშე, ფრედ – 0:0 დასრულდა. აღნიშნულ მატჩს 40 000 მაყურებელი დაესწრო და ეს მაჩვენებელი ქუთაისის ცენტრალური სტადიონისთვის დღემდე სარეკორდო მაჩვენებლად ითვლება. 1970 წლის სეზონი ქუთაისის ტორპედოსთვის წარუმატებელი გამოდგა, გუნდი სსრკ პირველობის უმაღლესი ლიგიდან პირველ ლიგაში დაქვეითდა და შესაბამისად მომდევნო სეზონი I ლიგაში დაიწყო. 1988 წელს სსრკ ჩემპიონატის უმაღლეს ლიგაში კიდევ ერთხელ დაბრუნდა ტორპედო, თუმცა ამ პერიოდში საქართველო სსრკ–ს ოფიციალურად გამოეყო და გუნდმა საქართველოს ჩემპიონატში განაგრძო ასპარეზობა. დამოუკიდებელი ქართული ფეხბურთის ისტორიაში ქუთაისის ტორპედო დინამო თბილისის შემდეგ, ყველაზე მეტჯერ გახდა საქართველოს ჩემპიონი. ქუთაისურმა გუნდმა 1999-00, 2000-01, 2001-02 წლებში ზედიზედ სამჯერ იმარჯვა ეროვნულ პირველობაზე. ამავე პერიოდს უკავშირდება ტორპედოს წარმატებული ასპარეზობა საქართველოს თასზეც, გუნდმა 1998–99, 2000–01 წლების სეზონში ოქროს მედლების მოპოვება შეძლო.
მწვრთნელი და ტორპედო
ხვალინდელ ქართულ დერბის ქუთაისის ტორპედო ახალი მწვრთნელით ხვდება. ჩვენს მეტოქეს უკრაინელი ფეხბურთის სპეციალისტი ალექსანდრ შტელინი დამოძღვრავს. შტელინი ტორპედოს 12 წლიანი განშორების შემდეგ უბრუნდება. მისი ხელმძღვანელობით გუნდმა ოთხი მატჩი გამართა ჩემპიონთა ლიგის საკვალიფიკაციო ეტაპზე და იასპარეზა მე- 14 ეროვნულ ჩემპიონატში.
დინამომდე
წლევანდელი გათამაშება ტორპედომ მარტვილის მერანთან 4:0 გამარჯვებით დაიწყო, რასაც თასის 1/16 ფინალში ხარაგაულის ჩხერიმელასთან 2:1 გამარჯვება მიაყოლა. შემდეგ იყო ფრე ზუგდიდთან 1:1 და ისევ გამარჯვება თასის საპასუხო მატჩში ოთხი უპასუხო გოლით. ქუთაისელები გორის დილასთან დამარცხდნენ 0:2 და ბათუმის დინამოსთან ფრედ 1:1 ითამაშეს. ტორპედომ თასის მერვედფინალში ჭიათურასთან 1:0 გამარჯვებას, იმავე ანგარიშით ფოთის კოლხეთთან გამარჯვება მიაყოლა. ჩვენმა მომავალმა მეტოქემ შემდეგ მიჯრით ორი მატჩი წააგო. შესაბამისად ცხინვალთან 1:3 და საჩხერის ჩიხურასთან 0:3.
ტორპედო vs დინამო – ურთიერთშეხვედრები
ქართული დერბი ყოველთვის უკომპრომისო ბრძოლით და თავდადებული თამაშით აღინიშნება, მომავალი მატჩი კი ამ გუნდების ურთიერთდაპირისპირებაში მესამოცე იქნება.
საქართველოს ჩემპიონატის ეგიდით ჩატარებული 59 მატჩიდან, 30- ჯერ გამარჯვება მტკვრისპირელებმა იზეიმეს, 14 შეხვედრა ფრედ დასრულდა, ხოლო 15 დაპირისპირებიდან რიონისპირელები გამოვიდნენ გამარჯვებულები. ბურთების შეფარდება 104/58 თბილისელთა სასარგებლოდ არის.
ამ შეხვედრებიდან აღსანიშნავია დინამოელთა საშინაო გამარჯვება ანგარიშით 5:1. ეს შედეგი ეროვნულ ასპარეზობაზე ორჯერ დაფიქსირდა. მეორე ჩემპიონატის მეოთხე ტურში 1991 წლის 1 აპრილს და მეშვიდე ჩემპიონატის მესამე ტურში 1995 წლის 17 სექტემბერს. ოთხბურთიანი სხვაობით დინამოელებმა მეტოქე 2013/2014 სეზონში დაამარცხეს, XXIV ეროვნული ჩემპიონატის მეორე ეტაპის მერვე ტურის მატჩში დინამომ ქუთასის ტორპედოს 4:0 აჯობა. 2000 წლის 27 აგვისტოს კი თბილისელები დიდი ანგარიშით 0:3 მეთორმეტე ჩემპიონატის მეორე ტურში დამარცხდნენ. ამ თამაშებს შორის ყველაზე დიდი სხვაობა თბილისელებმა ქუთაისში დააფიქსირეს. მეთვრამეტე ჩემპიონატის მეჩვიდმეტე ტურში 2007 წლის 17 მარტს ეროვნული გათამაშების ლიდერმა ანგარიშით 5:0 გაიმარჯვა. 2013 წლის 4 მაისს დინამო არენაზე თბილისელებმა 4:0 აჯობეს მეტოქეს და საქართველოს ჩემპიონის ტიტული დაისაკუთრეს.
დინამო - ტორპედოს დაპირისპირება მხოლოდ ეროვნული ჩემპიონატით არ შემოიფარგლბა. ეს გუნდები საბჭოთა კავშირის უმაღლეს ლიგაში 26- ჯერ შეხვდნენ ერთმანეთს და აქაც უპირატესობა დინამოელთა მხარესაა. ამ დაპირისპირებებიდან დინამომ ცამეტ თამაშში მიაღწია წარმატებას, 9 შეხვედრა დასრულდა ფრედ და 4-ჯერ ტორპედომ მოიგო. ბურთების შეფარდება 38/21. თბილისელებმა სამჯერ გაიმარჯვეს ანგარიშით 3:1, აქედან ერთხელ სტუმრად. შესაბამისად 1966 წლის 26 აპრილს, 1969 წლის 26 მაისსა და 1962 წლის 25 მაისს. მეტოქემ ანგარიშით 4:2 მიაღწია წარმატებას 1968 წლის 31 ივლისს. აღნიშვნის ღირსია უხვგოლიანი ფრე 3:3, რომელიც დაფიქსირდა ქუთაისში 1966 წლის 30 ნოემბერს.
შეგახსენებთ, რომ ბოლო შეხვედრა, რომელიც ამა წლის 2 მაისს თბილისში გაიმართა, ჩვენი გუნდის გამარჯვებით, ანგარიშით 3:2 დასრულდა. გოლები ქუთაისელთა კარში ლაშა თოთაძემ, გიორგი პაპუნაშვილმა და ჯაბა ჯიღაურმა გაიტანეს.
დისკვალიფიცირებული ფეხბურთელები
დისკვალიფიკაციის გამო ხვალინდელ შეხვედრას ტორპედოს შემადგენლობიდან- ოთარ კვერნაძე და ლაშა შინდაგორიძე გამოტოვებენ.
ტორპედო vs დინამო – მსაჯი
ხვალინდელ დერბის- ლევან კვარცხელია განსჯის. მას ასისტენტობას ლ. ვარამიშვილი და ზ. ფიფია გაუწევენ. დამატებითი ასისტენტები იქნებიან ა. ნონიკაშვილი და დ. სანოძე. სათადარიგო მსაჯის ფუნქციებს კი ა. ბასლეჰლო შეასრულებს.
უკანასკნელი შეხვედრა, რომელიც ლევან კვარაცხელიამ იმსაჯა 3 ოქტომბერს გამართული საპოვნელა 2:1 ლოკომოტივი გახლავთ, სადაც კვარაცხელიამ მატჩის მონაწილე ფეხბურთელები ოთხჯერ გააფრთხილა.
ჩვენი გუნდის მონაწილეობით ლევან კვარაცხელიამ უკანასკნელად 16 სექტემბერს იმსაჯა. საქართელოს თასის მერვედფინალის პირველ შეხვედრაში ჩვენი გუნდი ფოთის კოლხეთს დაუპირისპირდა და 1:0 აჯობა. ხსენებულ მატჩში ლევან კვარაცხელიამ ფეხბურთელებს ყვითელი ბარათი ერთხელ უჩვენა.
ჩვენს მიერ მოპოვებულ მასალებზე დაყრდნობით, მეტი თვალსაჩინოებისათვის ლევან კვარაცხელიას მიერ განსჯილი შეხვედრების სტატისტიკურ მონაცემებს გთავაზობთ:
ლევან კვარაცხელია
დაბადების თარიღი: 1979 წლის 18 მაისი
===========================================
უმაღლესი ლიგა - 83 თამაში / 322 ყვითელი / 18 წითელი / 17 პენალტი
პირველი ლიგა - 31 თამაში / 89 ყვითელი / 7 წითელი / 7 პენალტი
საქართველოს თასი - 16 თამაში / 59 ყვითელი / 5 წითელი / 5 პენალტი
უეფა.ევროპა ლიგა.საკვალიფიკაციო ეტაპი – 1 თამაში / 7 ყვითელი / 0 წითელი / 1 პენალტი
უეფა.ევროპის ჩემპიონატი U21.საკვალიფიკაციო ეტაპი – 2 თამაში / 10 ყვითელი / 1 წითელი / 1 პენალტი
უეფა.ევროპის ჩემპიონატი U17.საკვალიფიკაციო ეტაპი – 3 თამაში / 17 ყვითელი / 1 წითელი / 2 პენალტი
საერთაშორისო ამხანგური მატჩები – 3 თამაში / 17 ყვითელი / 3 წითელი / 2 პენალტი
ტორპედოს სავარაუდო შემადგენლობა
ჩვენი ვარაუდით, ხვალინდელ მატჩში ქუთაისელთა სასტარტო შემადგენლობა ასეთი იქნება:
თევდორაძე - ადამაძე, მამასახლისი, ტაბატაძე, ქიმაძე - ნერგაძე, კლიმიაშვილი, ოდიკაძე, კახელიშვილი, კუხიანიძე - სიჭინავა