დღეს დინამო არენაზე ფინალური შეხვედრით ლეგენდარული ქართველი ფეხბურთელის- ვიტალი დარასელიას სახელობის პირველი საერთაშორისო ტურნირი დასრულდა. გათამაშების გამარჯვებული ჰოლანდიური აზ ალკმაარი გახდა, რომელმაც დაძაბულ შეხვედრაში, ბოლო წუთებზე გატანილი ორი გოლის წყალობით დინამო თბილისი დაამარცხა. მანამდე კი თანმიმდევრობით მივყვეთ...
მე- 7 ადგილისთვის შეხვედრა ბეშიქთაშის უარის გამო არ შედგა. მიზეზი ტრავმირებული და სიცხიანი ფეხბურთელების ყოლა გახდა, რის გამოც თურქული კლუბი ვერ ახერხებდა 11 კაციანი განაცხადის შევსებას. ასე, რომ ტირასპოლის შერიფს 3:0 მოგება ჩაეთვალა და მე- 7 ადგილზე გავიდა.
მეხუთე ადგილისთვის მატჩი ლეხიასა და დინამო 2- ს შორის უგოლოდ დასრულდა. პენალტების სერიაში კი ვლადიმერ კაკაშვილის ფეხბურთელებმა იყოჩაღეს და 5:4 აჯობეს პოლონელებს. პოლონელთა მხრიდან გოლები კასპერ ზარებამ, მარსელ სტეფანიაკმა, მატეუშ კაჩინსკიმ და ბართლომეი მერხელმა გაიტანეს. თბილისელებმა კი ხუთივე დარტყმა გამოიყენეს: გოგა ლურსმანაშვილი, გიორგი ცერცვაძე, თორნიკე ძოწენიძე, ირაკლი აზაროვი და გიორგი გულდედავა გატანილი თერთმეტმეტრიანების ავტორები. გიორგი მამარდაშვილმა კი კონრად ვირას არ დაანება გატანა. საბოლოოდ მეხუთე ადგილი დინამო 2- ს ერგო.
ბრინჯაოს მედლებისთვის ერთამენთის პირისპირ თბილისის ლოკომოტივი და ტრაბზონსფორი წარდგნენ. თბილისელ ფეხბურთელებს აშკარად ეტყობოდათ გუშინდელი დაძაბული ნახევარფინალის გავლენა და სათანადო წინააღმდეგობა ვეღარ გაუწიეს სტუმრებს. ტრაბზონსფორმა ოთხი უპასუხო გოლით დაამარცხა ლოკომოტივი. დუბლი ტაიპ ჯუმურმა შეასრულა, თითო გოლი კი სეფა აკგიუნმა და აჰმეტ სევინჩმა გაიტანეს.
ტურნირის გადამწყვეტ შეხვედრას, რომელშიც დინამო და ალკმაარი დაუპირისპირდნენ ერთმანეთს, დინამო არენამ უმასპინძლა. ფინალმა დიდი ინტერესი გამოიწვია და სტადიონზე საკამო რაოდენობის გულშემატკივარმა მოიყარა თავი. შეხვედრა კი უაღრესად საინტერესოდ და დაძაბულად წარიმართა. თავიდანვე ღირს იმის აღნიშვნა, რომ ფინალმა თბილისელთა სათამაშო უპირატესობით ჩაიარა, მეტოქე კი ძირითადად კონტრშეტევაზე ეთამაშებოდა მასპინძელს. პაექრობის დებიუტში დინამოელებს ორჯერ შეეძლოთ ანგარიშის გახსნა. ჯერ გიორგი კუციას შორი მანძილიდან ძლიერად დარტყმული ბურთი იასპერ შენდელაარმა მოიგერია, რაშიც მას ხარიხაც დაეხმარა, ხოლო შემდეგ თამაზ ბაბუნაძე ურტყავდა ახლო მანზილიდან, ბურთი კი ოდნავ აცდა სამიზნეს. ალკმაარის ფეხბურთელებმა პირველი ტაიმის ბოლოსკენ სახიფათო შეტევა განახორციელეს და იმ მომენტში უკვე დინამოს კარი გადაარჩინა ძელმა. მეორე ნახევარში დინამოელები ბევრს ეცადნენ გოლის გატანას, მაგრამ ამაოდ, ბოლო მომენტში ხან ალკმაარის კიპერი თამაშობდა მაღალ დონეზე, ხანაც შემტევთა დარტყმას აკლდა სიზუსტე. შეხვედრის ბოლო წუთებზე, თბილისელთა კართან კუთხური დაინიშნა, ჩამოწოდებულ ბურთს ჯასტინ დე ჰაასმა თავი შეაგება და ანგარიშიც გახსნა. დინამო ვა ბანკზე წავიდა, მთელი გუნდით შეუტია, კონტრშეტევაზე ჩავარდა და ჯონ დე ბურმა მეორე გოლი გაიტანა. ამასთან ერთად შეხვედრაც დასრულდა. გაიმართა დაჯილდოვების საზეიმო ცერემონიალი, სადაც თბილისელები ვერცხლის მედლებით დაჯილდოვნენ, ხოლო მირონ ბადუმ გამარჯვებულის კუთვნილი თასი აღმართა. მანამდე ფეხბურთელებმა პერსონალური პრიზებიც მიიღეს: საუკეთესო მოთამაშედ ჯოუი იაკობსი (აზ ალკმაარი) დასახელდა. საუკეთესო ბომბარდირი დინამოელი- თამაზ ბაბუნაძე გახდა. საუკეთესო მეკარის პრიზი ალკმაარის კიპერმა- იასპერ შენდელაარმა მიიღო, ხოლო თბილისის ფეხბურთის ფედერაციის მიერ დაწესებული სამართლიანი თამაშის პრიზი ტრაბზონსფორის კაპიტანმა- აჰმეთ ჰაკან სევინჩმა ჩაიბარა.
შერიფი 3:0 (ტექნიკური მოგება) ბეშიქთაში
ლეხია 0:0 (4:5) დინამო 2
ლეხია: პიერნიცკი, კაჩინსკი, ლანდოვსკი, ფრიგერი, დაბროვსკი, ზარება, ტროხოვსკი, სჟიმანსკი, ლეტნიოვსკი, შტეფანიაკი, ესპერსენი
შეცვლაზე შევიდნენ: ვირა, სლავეკი, გოლუნსკი, მერხელი
დინამო 2: მამარდაშვილი, ცანავა, თუდები, ლურსმანაშვილი, მექვაბიშვილი, კვარაცხელია, ქობულაძე, აბულაძე, იაკობიძე, ძოწენიძე, შარაძე
შეცვლაზე შევიდნენ: ცერცვაძე, გულდედავა, ბერიაშვილი, აზაროვი
ლოკომოტივი 0:4 ტრაბზონსფორი
ლოკომოტივი: გურგენიძე, ჯაფარიძე, ძებნიაური, მჭედლიშვილი, რუხაძე, კაკაბაძე, გრძელიძე, გაბუნია, ნანობაშვილი, არჩვაძე, ქურდაძე
შეცვლაზე შევიდნენ: ანდრიაძე, გამცემლიძე, კვირიკაშვილი, ებრალიძე
ტრაბზონსფორი: თაშდემირი, სევინჩი, კარაკაში, იოზქანი, შაჰინი, ჯალაპი, აჩილი, ბაიკუში, თაშკინი, ჩინამრე, დურნა
შეცვლაზე შევიდნენ: ჯუმური, აკგიუნი, გენჩი
დინამო 0:2 აზ ალკმაარი
დინამო: ბულისკერია, ნინუა, ხარაბაძე, ბასარია, ბაბუნაძე, კუცია, დავითაშვილი, ჩაკვეტაძე, ბ. ხარშილაძე, ჯიჭონაია, გ. ხარშილაძე
შეცვლაზე შევიდნენ: თვალოძე, დარცმელია, ჩიქოვანი
აზ ალკმაარი: შენდელაარი, ბადუ, ენსი, ფასე, დე ჰაასი, იაკობსი, კოოპმაინერსი, ლატუვერსი, ნინგ-ჰინგი, რიერი, ვან დერ ვახტი
შეცვლაზე შევიდნენ: ტააბუნი, ლონტი, ჰელმერი, დე ბური