დღეს ვიტალი დარასელიას სახელობის დინამოს აკადემიის მოედანზე დუბლშემადგენლობათა გათამაშების პირველი ტურის მატჩი გაიმართა. დინამოს სარეზერვო შემადგენლობამ, რომელსაც თამაზ სამხარაძე თავკაცობს, სამტრედიის დუბლებს უმასპინძლა და დიდი ანგარიშით 3:0 დაამარცხა მეტოქე. აღსანიშნავია, რომ დინამოელები ამ სეზონში ერთობ გადახალისებული შემადგენლობით იასპარეზებენ. გუნდის უმეტესობას აკადემიიდან დაწინაურებული ფეხბურთელები შეადგენენ.
მატჩი ორივე გუნდმა აქტიურად დაიწყო, თუმცა ტაიმის შუამდე გამოსარჩევი სახიფათო მომენტი არ შექმნილა. დინამოელები ფლობდნენ სათამაშო უპირატესობას და პირველი ნახევრის ბოლოსკენ ორჯერ მოახერხეს სამტრედიელთა კარის აღება. 36- ე წუთზე ოთარ კობახიძემ თავისივე წაქცევისთვის დანიშნული თერთმეტმეტრიანი დარტყმა უნაკლოდ შეასრულა და ანგარიშიც გახსნა- 1:0. ტაიმის ბოლო წუთზე ოთარმა ლამაზი დარტყმით დუბლი შეასრულა და დინამო საგრძნობი უპირატესობით გავიდა შესვენებაზე. მეორე ტაიმში კიდევ იყო რამდენიმე სახიფათო მომენტი ორივე კართან. 88- ე წუთზე შეცვლაზე შემოსულმა ნიკა ლაშხიამ კი შორეული და ზუსტი დარტყმით მესამე გოლი გაიტანა მეტოქის კარში და შეხვედრის საბოლოო ანგარიში- 3:0 დააფიქსირა.
დინამო დუბლები 3:0 სამტრედია დუბლები
გოლები: 1:0 კობახიძე ო. 36’ (პენ) 2:0 კობახიძე ო. 45’ 3:0 ლაშხია 88’
დინამო (დუბ): კულუა, კაპანაძე, კაციტაძე (გადრანი 70), ლოჩოშვილი ქანთარია, ნემსაძე (გეგეშიძე 84), ვეკუა, ჩიხლაძე (ლაშხია 68), გაბრიჩიძე (კვერნაძე 56), ო. კობახიძე, ა. კობახიძე (გალდავაძე 73)
სამტრედია (დუბ): შაფათავა, თურმანიძე, თვალავაძე, მანჯგალაძე, ახალაძე, ჯიქიძე, ჩომახაშვილი, შილაკაძე, ჭეიშვილი, ჯანელიძე, ხვედელიძე