დღეს ვიტალი დარასელიას სახელობის დინამოს აკადემიის მოედანზე ბენდელას თასის გათამაშების მეოთხედფინალური შეხვედრა გაიმართა. ერთმანეთს დინამოს სარეზერვო შემადგენლობა და ცხინვალის სპარტაკი დაუპირისპირდნენ. შეხვედრა საინტერესოდ წარიმართა და კახი გოგიჩაიშვილის შეგირდების გამარჯვებით, ანგარიშით 2:1 დასრულდა.
მატჩის დებიუტში მე-5 წუთზე სტუმრებმა მოახერხეს ანგარიშის გახსნა. კონსტანტინე გაბაშვილმა ზუსტი დარტყმით დაასრულა თავისი გუნდის შეტევა - 0:1. 32- ე წუთზე კი ცოტნე მესხმა აღადგინა წონასწორობა 1:1. მთლიანობაში კი პირველი ტაიმი გარდამავალი უპირატესობით წარიმართა.
შეხვედრის მეორე ნახევარი დინამოელთა უპირატესობით წარიმართა, რაც 59- ე წუთზე გატანილ გოლში აისახა. თავის გამოჩენა კობახიძემ მოახერხა. დინამოელებს კიდევ შეეძლოთ სხვაობის გაზრდა, თუმცა ანგარიში მატჩის ბოლომდე აღარ შეცვლილა. კახი გოგიჩაიშვილის გუნდმა გაიმარჯვა 2:1 და კვირას 16 თებერვალს, ნახევარფინალში სკ ქუთაისს დაუპირისპირდება.
დინამო TV გთავაზობთ დღევანდელი შეხვედრის ამსახველ სიუჟეტს.
გოლები: 0:1 გაბაშვილი 5’ 1:1 ც. მესხი 32’ 2:1 კობახიძე 59’
დინამოს დუბლები: კულუა, თევზაძე, ნემსაძე, გურეშიძე, კაპანაძე, კვარაცხელია, ც. მესხი, მაჭავარიანი, ა. მესხი, კვერნაძე, კობახიძე
შეცვლაზე შემოვიდნენ: ვეკუა, კიტოვანი, გალდავაძე, მურუსიძე, კახნიაშვილი