14 აგვისტოს საქართველოს ეროვნული ნაკრების მსგავსად ამხანაგური შეხვედრები გამართეს 21–წლამდელთა და 19–წლამდელთა გუნდებმაც.
ეროვნული ნაკრები ასტანაში, ყაზახეთის ნაციონალურ გუნდს დაუპირისპირდა და მინიმალური ანგარიშით – 0:1 დამარცხდა. დინამოელი ელგუჯა გრიგალაშვილი თამაშში მატჩის 46–ე წუთზე ჩაერთო. ჩვენი გუნდის მარცხენა ფლანგელი, დავით კვირკველია მოედანზე 64–ე წუთზე გამოვიდა, ხოლო დინამოელთა კაპიტანი – გიორგი ლორია, მატჩის ბოლომდე სათადაგოთა სკამზე იმყოფებოდა.
საქართველოს ახალგაზრდულმა ნაკრებმა იურმალაში, ლატვიის ნაკრების წინააღმდეგ ითამაშა და მეტოქეს 4:0 სძლია. 21–წლამდელთა გუნდის სასტარტო შემადგენლობაში იყო დინამოელი გიორგი პაპავა, რომელმაც შეუცვლელად იასპარეზა.
საქართველოს 19–წლამდელთა ნაკრებმა თბილისში, მიხეილ მესხის სახელობის სტადიონზე პოლონელ თანატოლთა გუნდს უმასპინძლა. სპარინგი გატანილი გოლების გარეშე, ფრედ – 0:0 დასრულდა. ვასილ მაისურაძის გაწვრთნილი გუნდის სასტარტო შემადგენლობაში იყო დინამოელი სანდრო გურეშიძე, 45–ე წუთზე კი მოედანზე დინამოს კიდევ ორი მოთამაშე – გიორგი პაპუნაშვილი და ოთარ კაკაბაძეც ვიხილეთ.