შაბათს, 25 აგვისტოს დინამო თბილისი ზესტაფონში, დავით აბაშიძის სახელობის სტადიონზე ბათუმელ სეხნიას დაუპირისპირდება. ეროვნული ჩემპიონატის მესამე ტურის შეხვედრა 17.00 საათზე დაიწყება. ბათუმელები ოთხწლიანი განშორების შემდეგ კვლავ დაუბრუნდნენ უაღლეს ლიგას. ორ დინამოს შორის ჩატარებული ყოველი მატჩი უკომპრომისო ბრძოლით და თავდადებული თამაშით აღინიშნება, მომავალი შეხვედრა კი ამ გუნდების ურთიერთდაპირისპირებაში 44– ე იქნება.
საქართველოს ჩემპიონატის ეგიდით ჩატარებული 43 მატჩიდან, 31-ჯერ მტკვრისპირელებმა იზეიმეს გამარჯვება, 7 შეხვედრა დასრულდა ფრედ, ხოლო 5 დაპირისპირებიდან ზღვისპირელები გამოვიდნენ გამარჯვებულები. ბურთების შეფარდებაა 93/38 თბილისელთა სასარგებლოდ.
ურთიერთშეხვედრებში ყველაზე მეტჯერ– ექვსჯერ დაფიქსირდა ანგარიში 3:1. ხუთ–ხუთჯერ შეხვედრები 3:0, 2:0 და 1:0 დასრულდა. ყველაზე უხვგოლიანი მატჩი 1994 წლის 18 სექტემბერს გაიმართა. ბათუმში ჩატარებულ შეხვედრაში რვა გატანილი გოლი ვიხილეთ. აჩის ჰეთ–თრიქს შოთის დუბლი მიემატა და თბილისელებმა 5:3 იმარჯვეს. დიდი ანგარიშით დინამო მეთექვსმეტე ჩემპიონატის მეცხრე ტურში დამარცხდა. 2004 წელს ჩატარებულ შეხვედრაში დედაქალაქელები 0:3 დამარცხდნენ. ყველაზე დიდი ანგარიშით მტკვრისპირელებმა მეტოქე 2007 წლის 29 სექტემბერს დაამარცხეს. მეცხრამეტე ჩემპიონატის მეშვიდე ტურში დინამომ შვიდი უპასუხო გოლი გაუტანა ბათუმელ სეხნიას. თავი კი გამოიჩინეს: კობახიძემ და აკირემმა დუბლებით, ხუციშვილმა, სპასოევიჩმა და ხმალაძემ კი თითო გოლით.
ბოლო შეხვედრა ამ გუნდებს შორის, რომელიც 2008 წლის 4 აპრილს ბათუმში გაიმართა, ჩვენი გუნდის გამარჯვებით 4–1 დასრულდა. იმ შეხვედრაში ხუციშვილის დუბლს თითო გოლი სპასოევიჩმა და ხმალაძემ მიამატეს.