დღეს დავით პეტრიაშვილის სახელობის სტადიონზე ეროვნული ლიგის მე-6 ტურის მატჩი გაიმართა, რომელშიც გაგრამ დინამოს უმასპინძლა.
დედაქალაქელებმა შეხვედრაში ტრავმების გამო საბა ხვადაგიანი, ნიკოლოზ უგრეხელიძე, ჯონ არტური და ვაკო გვილია მოისაკლისეს.
თავად მატჩი კი დინამოელებმა აქტიურად დაიწყეს და სათამაშო უპირატესობა ბოლომდე შეინარჩუნეს. ანგარიში შორეული და ‘თავის სტილში’ დარტყმით ნიკა ნინუამ მე-19 წუთზე გახსნა. ექვსიოდე წუთში იმავე ნინუას უზადო გადაცემის შემდეგ ბრაზილიელმა ლეო ასუნსეუმ თბილისელთა მაისურით სადებიუტო გოლი გაიტანა 0-2.
მეორე ტაიმში სათამაშო სცენარი არ შეცვლილა. დინამომ მესამე გოლი მატჩის ბოლოსკენ გაიტანა, შეცვლაზე შემოსულმა ვახო სალიამ ბოგდან პოტალოვის გადაცემის შემდეგ ზუსტად შეარჩია პოზიცია და გაგრელებს გაუტანა. მეოთხე გოლი ასევე ცვლილებაზე გამოსულმა თემო ოდიკაძემ გაიტანა. ახალგაზრდა შემტევმა მეტოქის საჯარიმოში ტექნიკურად ითამაშა და სადებიუტო გოლით საფინალო ანგარიში 0-4 დააფიქსირა.
მომდევნო მატჩს დინამო 9 აპრილს ჩაატარებს. დინამო არენაზე ჩვენი გუნდი ტურის ცენტრალურ შეხვედრაში იბერიას უმასპინძლებს.
მატჩის ოქმი
ფოტოამბავი