ჩვენი მეტოქე
საფეხბურთო კლუბი გაგრა 2004 წელს დაარსდა. გაგრელთა საკლუბო ფერები ლურჯსა და თეთრშია გადაწყვეტილი, მიმდინარე სეზონში კი გუნდი საშინაო მატჩებს თბილისში, პეტრო არენაზე ატარებს. პირველ ლიგაში გაგრა მუდამ ცხრილის ზედა ნაწილში ხვდებოდა, მაგრამ უმაღლესში გადასვლას ვერ ახერხებდა. 2007 წელს ფლეი ოფში საჩხერის ჩიხურასთან დამარცხდა, 2008 წელს კი ცხინვალის სპარტაკთან. 2008 წლის 31 მაისს პროფესიული ფეხბურთის ლიგის გამგეობამ უმაღლესი ლიგის საგზურის მფლობელის, პირველი ლიგის გამარჯვებულის ჭიათურის მაღაროელის საკითხი განიხილა და რადგან იმერულმა კლუბმა ლიცენზირების კრიტერუმები ვერ დააკმაყოფილა და ვერც ფინანსური გარანტიები წარადგინა 2008/2009 წლების ეროვნული ჩემპიონატის უმაღლესი ლიგის გათამაშებაში მონაწილეობის უფლება ჩამოართვა და მის ნაცვლად უმაღლესი ლიგის ლიცენზიის მქონე გაგრა დაუშვა. 2010-2011 წლების სეზონი გაგრასთვის ყოველმხრივ გამორჩეული გახლდათ: გუნდი პირველი ლიგის ჩემპიონი და ქვეყნის თასის მფლობელი გახდა. ასეთი წარმატებული სეზონი გუნდს მისი დაარსების დღიდან არ ჰქონია. 2011 წელს გუნდმა უმაღლესი ლიგის საგზურიც უპრობლემოდ მოიპოვა, საქართველოს თასიც დაისაკუთრა და ახალგაზრდულ გუნდს ევროტურნირებზე დებიუტიც ჰქონდა, სადაც კვიპროსის ანორთოსისს შეხვდა. გასვლითი შეხვედრა გაგრელებმა სტუმრად, ანგარიშით 0-3 დათმეს, თუმცა ზესტაფონში გიორგი გაბედავასა და გიორგი ტყეშელაშვილის გოლებით 2-0 დაამარცხეს მეტოქე. უმაღლეს ლიგას გაგრა ათწლიანი პაუზის შემდეგ დაუბრუნდა. გუნდმა 2021 წელს ეროვნული ლიგა-2 მეორე ადგილზე დაასრულა. გადათამაშებაში ქობულეთის შუქურას აჯობა და ეროვნული ლიგის საგზური მოიპოვა.
ურთიერთშეხვედრები გაგრასთან
აქამდე ეს გუნდები ეროვნულ ჩემპონატში 20-ჯერ შეხვდნენ ერთმანეთს. დინამოს უპირატესობა 14 მოგებული თამაშით გამოიხატება, სამი შეხვედრა ფრედ მორჩა და სამჯერ იმარჯვეს გაგრელებმა. ბურთების ბალანსია 40/11 დინამოს სასარგებლოდ.
პირველი გამარჯვება გაგრამ თავის აქტივში ამ ურთიეთშეხვედრების პიველ მატჩში ჩაიწერა. ეს შეხვედრა 2008 წლის 14 სექტემბერს გაიმართა, მეოცე ჩემპიონატის პირველ ტურში და ანგარიშით 2-1 დასრულდა გაგრელთა სასარგებლოდ. თბილისელთა წარმატებული შეხვედრებიდან კი აღსანიშნავია დიდი ანგარიშით გამარჯვება იმავე ჩემპიონატის მეთორმეტე ტურში 21 ნოემბერს. ის თამაში დინამომ ანგარიშით 3-0 მოიგო. ასევე დიდი ანგარიშით, 4-1 იმარჯვეს მტკვრისპირელებმა 2010 წლის 8 თებერვალს, ოცდამეერთე ჩემპიონატის ოცდამერვე სათამაშო დღეს. ანგარიშში ყველაზე დიდი სხვაობა ამ გუნდების მონაწილეობით 2022 წლის 20 ივნისს დაფიქსირდა. დინამომ დიდი ანგარიშით 5-0 მოიგო. გოლები უსმანე კამარამ, გიორგი მოისწრაფიშვილმა, ბარნს ოსეიმ, ანზორ მექვაბიშვილმა და დავით სხირტლაძემ გაიტანეს. ყველაზე მეტი გოლი კი ამ გუნდების დაპირისპირებაში 2023 წლის 8 მარტს გავიდა. დინამომ თბილისის ზღვის მოედანზე გამართულ მატჩში 5-3 აჯობა მეტოქეს. გოლები იმრან ულად ომარმა, უსმანე კამარამ (2), გაბრიელ სიგუამ და ზორან მარუშიჩმა გაიტანეს. ანგარიშში დიდი სხვაობა დინამომ მომდევნო წრეშიც გაიმეორა. ამჯერად 13 აგვისტოს ჩატარებული მატჩი თბილისელებმა 6-1 მოიგეს. ჰეთ თრიქი იმრან ულად ომარმა შეასრულა, დუბლი დავით სხირტლაძის ანგარიშზეა, ერთი გოლიც მეტოქემ საკუთარ კარში გაიტანა.
წელს ეს გუნდები 16 აპრილს შეხვდნენ ერთმანეთს. დინამომ პეტრო არენაზე ნიკა უგრეხელიძის და ვასილიოს გორდეზიანის გოლებით 2-0 მოიგო. 1 ივნისს გამართული მატჩი ასევე დინამომ მოიგო 2-0. გოლები დომინიკ საიმონმა და ვახო სალიამ გაიტანეს. 1 ოქტომბერს ჩატარებული მატჩი გატანილი გოლების გარეშე დასრულდა.