დღეს საღამოს კლუბებს შორის საბოლოო შეთანხმება მოხდა, რის შედეგადაც გიორგი პაპუნაშვილი კარიერას ესპანური სეგუნდა დივიზიონის რეალ სარაგოსაში გააგრძელებს. სარაგოსას ექვსჯერ აქვს სამეფო თასი მოპოვებული, ხოლო 1994/95 წლების სეზონში არაგონულმა კლუბმა უეფას თასების მფლობელთა თასი მოიპოვა. გიორგი დინამოში 2011 წლიდან ირიცხება, ხოლო მისი დებიუტი ძირითად შემადგენლობაში 2013 წლის 30 ნოემბერს, მიხეილ მესხის სახელობის სტადიონზე- ცხინვალის წინააღმდეგ შედგა. დინამოს ათიანმა საქართველოს პირველობაზე დღემდე ლურჯი მაისურით 61 მატჩი ჩაატარა და 22 გოლის გატანა შეძლო.