ხუთშაბათს 9 ივლისს დინამო თბილისი გაბალაში უეფას ევროპა ლიგის პირველი ეტაპის საპასუხო მატჩს გამართავს. ევროთასის მატჩი გაბალას ცენტრალურ სტადიონზე თბილისის დროით 20:00 საათზე დაიწყება. მის პირდაპირ რეპორტაჟს საზოგადოებრივი მაუწყებლის პირველი არხი შემოგთავაზებთ.
9 ივლისს დინამოს თავის ისტორიაში 6 მატჩი აქვს გამართული. 2 მოგება თბილისელებს დარჩათ, 3 მატჩი ფრედ დასრულდა და ერთხელაც მეტოქემ გვაჯობა. გატანილი და გაშვებული ბურთების ბალანსი 12/8 დინამოს სასარგებლოდ.
1971 წელს ლვოვში ადგილობრივ კარპატისთან დაპირისპირება ფრედ 2:2 დასრულდა. გოლები ნოდიამ და კუტივაძემ გაიტანეს. 1974 წელს დნეპროპეტროვსკის დნეპრთან მატჩი უგოლოდ დასრულდა. 1978 წელს თბილისელებმა ვოროშილოვგრადის ზარია მიიღეს და ერთის წილ ოთხი გოლი გაუტანეს მეტოქეს. ქორიძემ დუბლი შეასრულა, თითო გოლი კი შენგელიას და გუცაევის ანგარიშზეა. 1982 წელს დინამომ ბაქოს ნეფთჩი მიიღო. მეზობლებთან მატჩი ჩვენი გუნდის გამარჯვებით 5:3 დასრულდა. ორი გოლი ცაავამ გაუტანა ბაქოელებს, თითო შედეგიანი დარტყმაც შენგელიას, სვანაძის და დარასელიას ანგარიშზეა. 1986 წელს ხარკოვში მეტალურგს ჭედიამ გაუტანა გოლი და მატჩი ფრედ 1:1 დასრულდა. 2006 წელს ინტერტოტოს მეორე ეტაპზე ჩვენი გუნდი ავსტრიულ რიდთან მინიმალური ანგარიშით 0:1 დამარცხდა.