სიახლეები

კვირას 20 სექტემბერს დინამო თბილისი საქართველოს ჩემპიონატის მეხუთე ტურის შეხვედრაში საფეხბურთო კლუბ ზუგდიდს მიიღებს. მატჩი დინამო არენაზე 18.00 საათზე დაიწყება.

20 სექტემბერს დინამოელებს თავის ისტორიაში 9 ოფიციალური მატჩი აქვთ გამართული. 5 შეხვედრა თბილისელთა მოგებით დასრულდა, 3 მატჩი ფრედ ვითამაშეთ და ერთხელაც დავმარცხდით. გატანილი და გაშვებული ბურთების ბალანსია 13/3 დინამოს სასარგებლოდ.

1946 წელს დინამომ მოსკოვის კრილია სოვეტოვი მიიღო და გიორგი ანთაძის გოლით 1:0 აჯობა მეტოქეს. 1955 წელს თბილისელები მოსკოვის სპარტაკთან 1:2 დამარცხდნენ. გოლი ზაურ კალოევის ანგარიშზეა. 1961 წელს მოსკოვის ცსკა- თან დაპირისპირება ჩვენი გუნდის სასარგებლოდ 3:0 მორჩა. შოთა იამანიძემ ორჯერ აიღო არმიელთა კარი, ერთი გოლი ილია დათუნაშვილმა გაიტანა. 1964 წელს ვლადიმერ ბარქაიას გოლი და 1:0 მოგება კიშინიოვის მოლდოვასთან. მომდევნო სეზონზე მოსკოვში თანაკლუბელთან უგოლო ფრე ვითამაშეთ. 1969 წელს იმავე გუნდს თბილისში 3:1 ვაჯობეთ. ლევან ნოდიას დუბლს ერთი გოლი გოჩა გავაშელმა მიამატა.

1998 წელს ზუგდიდში ოდიშს ეთამაშა დინამო. მიხეილ აშვეთიამ დუბლი შეასრულა. ლევან ცქიტიშვილმა და გიორგი შენგელიამ თითო გოლი გაიტანეს. საბოლოოდ დინამომ 4:0 მოუგო მასპინძლებს. 2003 და 2004 წლებში ბოლნისის სიონთან და თბილისის ლოკომოტივთან შეხვედრები 0:0 დასრულდა.