საქართველოს ეროვნული ნაკრები 24 მაისს შეკრებაზე ავსტრიაში გაემგზავრება და ლინცთან ახლოს დაბანაკდება. ჯვაროსნები 27 მაისს ქალაქ ველსში სლოვაკეთის ნაკრებს გაეჯიბრებიან, 3 ივნისს ბუქარესტში რუმინეთის ნაკრებს ესტუმრებიან და 7 ივნისს მადრიდში ესპანეთის ეროვნულ ნაკრებს შეხვდებიან. ვლადიმერ ვაისმა ამ მატჩებისთვის 6 დინამოელი იხმო. ეროვნული ნაკრების ფორმას ალექსანდრე ამისულაშვილი, უჩა ლობჟანიძე, ოთარ კაკაბაძე, ჯაბა ჯიღაური, ვახტანგ ჭანტურიშვილი და გიორგი ქვილითაია მოირგებენ. აღსანიშნავია, რომ ჯიღაური და ჭანტურიშვილი პირველად არიან ეროვნულ ნაკრებში გამოძახებულნი.