9 აპრილს ეროვნული ლიგის მეექვსე ტურში ერთმანეთის წინაშე დინამო ბათუმი და დინამო თბილისი წარსდგებიან. ზღვისპირელთა და მტკვრისპირელთა 51- ე დაპირისპირება ქობულეთში, ჩელე არენაზე 16.00 საათზე დაიწყება.
საქართველოს ჩემპიონატის ეგიდით ჩატარებული 50 მატჩიდან, 35- ჯერ მტკვრისპირელებმა იზეიმეს გამარჯვება, 8 შეხვედრა დასრულდა ფრედ, ხოლო 7 დაპირისპირებიდან ზღვისპირელები გამოვიდნენ გამარჯვებულები. გატანილი და გაშვებული ბურთების ბალანსია 104/44 თბილისელთა სასარგებლოდ.
ურთიერთშეხვედრებში ყველაზე მეტჯერ- ექვსჯერ დაფიქსირდა ანგარიში 3:1 და 3:0. ხუთჯერ და რვაჯერ შეხვედრები 2:0 და 1:0 დასრულდა. ყველაზე უხვგოლიანი მატჩი 1994 წლის 18 სექტემბერს გაიმართა. ბათუმში ჩატარებულ შეხვედრაში რვა გატანილი გოლი ვიხილეთ. არჩილ არველაძის ჰეთ–თრიქს, შოთა არველაძის დუბლი მიემატა და თბილისელებმა 5:3 იმარჯვეს. იმავე ანგარიშით იმარჯვა დინამო თბილისმა 2012 წლის 11 ნოემბერს. დიდი ანგარიშით დინამო მეთექვსმეტე ჩემპიონატის მეცხრე ტურში დამარცხდა. 2004 წელს ჩატარებულ შეხვედრაში დედაქალაქელები 0:3 დამარცხდნენ. ყველაზე დიდი ანგარიშით მტკვრისპირელებმა მეტოქე 2007 წლის 29 სექტემბერს დაამარცხეს. მეცხრამეტე ჩემპიონატის მეშვიდე ტურში დინამომ შვიდი უპასუხო გოლი გაუტანა ბათუმელ სეხნიას. თავი კი გამოიჩინეს: სანდრო კობახიძემ და ჯორჯ აკირემმა დუბლებით, მიხეილ ხუციშვილმა, ილია სპასოევიჩმა და ლევან ხმალაძემ კი თითო გოლით.
ბოლო შეხვედრა ამ გუნდებს შორის, რომელიც 2016 წლის 10 დეკემბერს თბილისში, მიხეილ მესხის სახელობის სტადიონზე გაიმართა, ბათუმელთა გამარჯვებით 1:0 დასრულდა.
p.s. 9 აპრილს დინამოს მხოლოდ ერთი ოფიციალური მატჩი აქვს ჩატარებული. 1960 წელს ჩვენმა გუნდმა ხარკოვის ავანგარდს 2:0 მოუგო. ორივე გოლი უკრაინელთა კარში ზაურ კალოევმა გაიტანა.