დინამოელებმა თურქეთში საწვრთნელ შეკრებაზე მესამე მატჩი ყარაგანდის შახტიორთან გამართეს. საკმაოდ აქტიური და საინტერესო მატჩი საბოლოოდ გატანილი გოლების გარეშე დასრულდა. მატჩის დებიუტში, მეექვსე წუთზე თბილისელებმა სახიფათო შეტევა განახორციელეს. ჯერ ლევან ხარაბაძეს, შემდეგ კი დამატებაზე ბუდუ ზივზივაძეს შეძლოთ თავის გამოჩენა, მაგრამ დინამოელებმა უზუსტოდ ითამაშეს. ოციოდე წუთში თბილისელებმა ლამაზი საგოლე კომბინაცია განახორციელეს, მარჯვენა ფრთიდან გუჯა რუხაიამ ზუსტად გადააწოდა ლევან ხარაბაძეს, ამ უკანასკნელის დარტყმული კი ზევიდან გადაცდა მეტოქის კარს. 35- ე წუთზე ოთარ კიტეიშვილი ხელსაყრელი პოზიციიდან არტყავდა, ოდნავ არაზუსტად. ტაიმის ბოლოს დინამოელებს კიდევ ჰქონდათ სახიფათო მომენტი, კუთხურის შემდეგ აკაკი შულაია ემუქრებოდა შაცკის კარს. მეორე ტაიმი დინამომ საკმაოდ აქტიურად დაიწყო და მთლიანად სათამაშო-ტერიტორიული უპირატესობაც მოიპოვა. მოედანზე სინჯებზე მყოფი უკრაინელი ფორვარდი მაქსიმ მარუსიჩიც გამოჩნდა, რომელმაც აქტიურად ჩაატარა დარჩენილი 45 წუთი. დინამოელები ბევრს უტევდნენ, რამდენიმე ხელსაყრელი მომენტი იმავე მარუსჩს, კიტეიშვილს, შულაიას ჰქონდათ, მაგრამ ბოლო მომენტში ხან სიზუსტე აკლდებოდათ ჩვენი გუნდის შემტევებს, ხანაც მეტოქის კიპერი თამაშობდა კარგად. შეხვედრის ბოლოსკენ ერთი რეალური საგოლე მომენტი მეტოქემაც შექმნა, თუმცა კარი ბოლო წამს ტერენტი ლუცევიჩმა გადაარჩინა. საბოლოოდ ფრე 0:0. ბოლო შეხვედრას დინამოელები თურქულ შეკრებაზე 25 თებერვალს, ყაზახეთის პირველობის მესამეადგილოსან ორდაბასთან გამართავენ.
დინამო თბილისი 0:0 შახტიორი ყარაგანდა
დინამო: ბულისკერია (გოშაძე 46), რუხაია, ლუცევიჩი, კობოური, ხარაბაძე, ქარდავა (კუცია 46), ივანისენია (ნინუა 83), შულაია, კიტეიშვილი, ივანიშვილი (ერგემლიძე 83), ზივზივაძე (მარუსიჩი 46)
შახტიორი ყარაგანდი: შაცკი, ტარასოვი, გაბიშევი, სტოიანოვიჩი, შახმეტოვი, შაფი, მიგუნოვი, ვოლოდკო, ტკაჩუკი, მუჟეკი, კოიაშევიჩი