ოთხშაბათს 2 მაისს, ეროვნული ლიგის მეცხრე ტურში დინამო თბილისი გორში ადგილობრივ დილას დაუპირისპირდება. შეხვედრა თენგიზ ბურჯანაძის სახელობის სტადიონზე 20 საათსა და 30 წუთზე დაიწყება.
ჩვენი მეტოქე
გორის საფეხბურთო კლუბი 1949 წელს შეიქმნა და არსებობის მანძილზე სახელწოდება რამდენჯერმე შეიცვალა. 1961 წლიდან კი დილა ეწოდა. გუნდი საშინაო შეხვედრებს გორში, თენგიზ ბურჯანაძის სახელობის სტადიონზე ატარებს, რომელიც 8 000 მაყურებელზეა გათვლილი. კლუბის სიმბოლიკა ძირითადად ცისფერ და ბორდოსფერშია გადაწყვეტილი. საქართველოს ეროვნული ჩემპიონატის დაწყებიდან 18 წლის შემდეგ – 2008 წელს, გორის დილა უმაღლეს ლიგას დაემშვიდობა. პირველ ლიგაში დაქვეითებულმა გორელებმა მომდევნო – 2009/2010 წლების სეზონი მეორე ლიგაში დაიწყეს. დილა უმაღლეს ლიგას სამწლიანი პაუზის შემდეგ დაუბრუნდა. გუნდმა ჯერ 2009/2010 წლების სეზონში მოიპოვა პირველ ლიგაში ასპარეზობის უფლება, შემდეგ კი 2010/2011 წლების სეზონში უმაღლესი ლიგის საგზურიც მოიპოვა. პირველი ლიგის მესამეადგილოსანმა გორის დილამ გადათამაშებაში სამტრედიას 2:0 მოუგო და ქართული ფეხბურთის ელიტაში დაბრუნდა. გორის დილამ თავისი პირველი ტიტული 2011/2012 წლების სეზონში მოიპოვა. შიდაქართლელებმა საქართველოს დავით ყიფიანის სახელობის თასის გათამაშების ფინალურ შეხვედრაში ზესტაფონს 4:1 მოუგეს. 2014/2015 სეზონი კი გორელთათვის ტრიუმფალური აღმოჩნდა. დილამ თავის ისტორიაში პირველად საქართველოს ჩემპიონატის ოქროს მედლები მოიპოვა. ასევე დილამ ვერცხლის მედლები ირგუნა სუპერთასის ფინალში, სადაც 0:1 დამარცხდა დინამოსთან.
მწვრთნელი და დილა
2017 წლის ივნისში გორის დილას მთავარი მწვრთნელის პოსტზე ებრაელი ფეხბურთის სპეციალისტი ზივ არიე, გიორგი დარასელიამ შეცვალა. დარასელია 2012 წელსაც მუშაობდა გორში. დღეისათვის მისი გუნდი ჩატარებული 8 ტურის შემდეგ დაგროვილი 15 ქულით, სატურნირო ცხრილში მეოთხე ადგილზე იმყოფება.
დინამომდე
დილამ მიმდინარე პირველობაზე პირველ მატჩში ტორპედო 3:2 დაამარცხა. შემდეგ იყო ფრე ჩიხურასთან 1:1 და მარცხი საბურთალოსთან 0:2. ამას დილამ ორი გამარჯვება მიაყოლა- სიონთან 3:2 და კოლხეთთან 3:0. შემდეგ იყო უგოლო ფრე სამტრედიასთან და 2:2 რუსთავთან. ლოკომოტივი კი გორელებმა 3:1 დაამარცხეს.
დილა - დინამო
ეროვნულ ასპარეზზე ეს გუნდები ერთმანეთს 59- ჯერ შეხვედრიან. ურთიერთშეხვედრებში დინამოს უპრეცენდენტო უპირატესობა აქვს. 43 შემთხვევაში გამარჯვება თბილისელებს დარჩათ, 12 შეხვედრა ფრედ დასრულდა და 4 თამაში გორელებმა მოიგეს. გატანილი და გაშვებული ბურთების ბალანსი ჩვენი გუნდის სასარგებლოდ 152/33 არის.
ყველაზე დიდი ანგარიშით დინამომ 2005 წლის 2 აპრილს იმარჯვა. XVI ჩემპიონატის ოცდამეექვსე ტურში გამართული შეხვედრა 9:0 დასრულდა. ასევე ცხრა ბურთი გავიდა 1993 წლის 16 ნოემბერს ჩატარებულ მატჩში. მეხუთე ჩემპიონატის მეთხუთმეტე სათამაშო დღეს თბილისელებმა 7 ბურთი გაიტანეს, გორელთა 2 გოლის საპასუხოდ. აღსანიშნავია, რომ სამჯერ დაფიქსირდა ხუთბურთიანი სხვაობა- 6:1 და ოთხჯერ 5:0, ხოლო ოთხ-ოთხჯერ შეხვედრა დასრულდა ანგარიშით 4:1 და 4:0. ფრედ ჩატარებული შეხვედრებიდან ექვსი მატჩი უგოლოდ, სამი შეხვედრა 2:2 და 1:1 დასრულდა. გორის დილამ პირველად ჩვენს გუნდს 2012 წლის 15 სექტემბერს მოუგო (2:0).
ბოლოს საქართველოს პირველობაზე დინამო თბილისი გორის დილას 2017 წლის 19 ოქტომბერს დაუპირისპირდა. მატჩი გორში, თენგიზ ბურჯანაძის სახელობის სტადიონზე გაიმართა და თბილისელთა გამარჯვებით 2:1 დასრულდა. დუბლი მასპინძელთა კარში ლაშა თოთაძემ შეასრულა.
მსაჯი და დისკვალიფიცირებული ფეხბურთელები
მატჩის მთავარი არბიტრი ჯენერი ხორავა გახლავთ. მას ასისტენტობას ს. სპიცინი და კ. სადილიანი გაუწევენ. დამატებითი ასისტენტები დ. ხარიტონაშვილი და შ. ქუხილავა იქნებიან. მეოთხე მსაჯი ა. აფციაური იქნება. შეხვედრას დისკვალიფიკაციის გამო ფეხბურთელები არ გამოტოვებენ.