დინამო თბილისი საქართველოს XXV ეროვნული ჩემპიონატის XXVI ტურის შეხვედრას თბილისში დინამო არენაზე, ბოლნისის სიონის წინააღმდეგ გამართავს. 12 აპრილს შეხვედრა 18:00 საათზე დაიწყება და დაპირისპირების პირდაპირი რეპორტაჟის ხილვა ჩვენი კლუბის ოფიციალურ ვებ–გვერდის მეშვეობით შეგეძლებათ.
ჩვენი მეტოქე
ბოლნისის საფეხბურთო კლუბი სიონი საქართველოს ეროვნულ ჩემპიონატში 1995 წლიდან ასპარეზობს. გუნდი საშინაო შეხვედრებს ბოლნისში, თამაზ სტეფანიას სახელობის სტადიონზე მართავს, რომელიც 3300 მაყურებელს იტევს. ბოლნისის სიონის საკლუბო ფერები ძირითადად თეთრ და ყვითელ ფერებში არის გადაწყვეტილი. ბოლნისურმა კლუბმა ისტორიაში ყველაზე დიდ წარმატებას 2005–2006 წლების სეზონში მიაღწია – გუნდმა საქართველოს ჩემპიონის ტიტული მოიპოვა და ჩემპიონთა ლიგის გათამაშების საკვალიფიკაციო ეტაპზე იასპარეზა.
მწვრთნელი და სიონი
ბოლნისის სიონის მთავარი მწვრთნელი 2013 წლის ოქტომბრის ბოლოდან ვლადიერ ბურდულია. მისი თავკაცობით გუნდმა მიმდინარე სეზონში უმაღლეს ლიგაში ჩატარებული თექვსმეტი თამაშიდან ათი შეხვედრა მოგებითა და სამი მატჩი საყაიმო ანგარიშით დაასრულა. სამ შეხვედრაში სიონი დამარცხდა. სიონი სატურნირო ცხრილში 42 ქულით მესამე საფეხურზე იმყოფება.
დინამომდე...
ბოლნისის სიონმა ზამთრის შესვენება ნაყოფიერად გამოიყენა და თურქულ შეკრებამდე ჯერ სპარტაკთან და ვიტ ჯორჯიასთან (1:5, 1:1) ჩაატარა სპარინგ მატჩები. თურქეთში კი, ირტიშთან დამარცხდა 1:4, წააგო ბატესტან 1:2, მარცხი მტკ– სთან 0:2, დიორს მოუგეს 1:0 და ფრე სევასტოპოლთან ანგარიშით 2:2. თასზე სიონმა ჩიხურასთან ფრედ ითამაშა 1:1. აჯობა დინამოს 2:1. იმავე ანგარიშით დამარცხდა ტორპედოსთან. გამარჯვება მეტალურგთან 2:0. მარცხი ზესტაფონთან 0:1 და თასზე ჩიხურასთან 1:2. სამი გამარჯვება მიყოლებით. ჩიხურასთან 2:1, მეტალურგთან 2:0 და გურიასთან 2:1.
დინამო VS სიონი
დღემდე ამ გუნდებს შორის ეროვნულ ასპარეზზე 51 შეხვედრა გაიმართა. ურთიერთშეხვედრებში დინამოელთა უპირატესობა აშკარაა – 42 მოგება, 4 ფრე და 5 მარცხი. გატანილი და გაშვებული ბურთების შეფარდება დედაქალაქელთა სასარგებლოდ 128/25 არის. დედაქალაქელმა ფეხბურთელებმა 42 გამარჯვებიდან მეტოქე 15 შეხვედრაში დიდი ანგარიშით დაამარცხეს. აქედან აღსანიშნავია 1996 წელს გამართული მატჩი, რომელშიც ჩვენმა გუნდმა ბოლნისის სიონს 8:0 მოუგო. ჩვენმა ფეხბურთელებმა სიონის კარში ამდენივე გოლი გაიტანეს 1998 წელსაც, თუმცა საპასუხოდ ერთი გოლი მიიღეს და დაპირისპირება დინამოს გამარჯვებით – 8:1 დასრულდა. ყველაზე დიდი სხვაობით დინამომ ბოლნისის სიონი 2000 წელს დაამარცხა, ჩვენმა გუნდმა მეტოქეს 9:0 სძლია. დინამო თბილისისა და ბოლნისის სიონის უკანასკნელი დაპირისპირება 26 თებერვალს შედგა. დინამო არენაზე გამართული მატჩი სტუმრების გამარჯვებით, ანგარიშით 1:2 დასრულდა. გოლი ჩისკოს ანგარიშზეა.
დისკვალიფიცირებული ფეხბურთელები
დისკვალიფიკაციის გამო ხვალინდელ მატჩს დინამო თბილისის ნახევარმცველი – ირაკლი ძარია დააკლდება. ბოლნისელთა რიგებში კი დისკვალიფიცირებული ზვიად ლობჯანიძეა.
დინამო VS სიონი – მსაჯი
დინამო თბილისისა და ბოლნისის სიონის ხვალინდელ შეხვედრას, რომელიც დინამო არენაზე გაიმართება, ბაკურ ნინუა განსჯის. მატჩის მთავარ არბიტრს ასისტენტობას ბ. ჭიჭინაძე და გ. ელიკაშვილი გაუწევენ. მეოთხე მსაჯის ფუნქციებს გ. ყრუაშვილი შეასრულებს. ბოლო მატჩი, რომელიც იმსაჯა ბაკურ ნინუამ 5 აპრილს გამართული ზესტაფონი 1:0 გურია გახლავთ. იმ შეხვედრაში მსაჯმა ოთხი ფეხბურთელი გააფრთხილა. ჩვენი გუნდის მონაწილეობით ბაკურ ნინუამ უკანასკნელად 2013 წლის 15 დეკემბერს გამართული დინამო 0:1 ვიტ ჯორჯია იმსაჯა. აღნიშნულ მატჩში შეხვედრის მთავარმა არბიტრმა ფეხბურთელებს სამი ყვითელი ბარათი უჩვენა.
ბოლნისის სიონის სავარაუდო შემადგენლობა
ჩვენი ვარაუდით, ხვალინდელ მატჩში ბოლნისელთა სასტარტო შემადგენლობა ასეთი იქნება:
მერლანი – კანდელაკი, იმედაშვილი, აბრამიძე, ქემოკლიძე – განუგრავა, გოგობერიშვილი, აფციაური, კახელიშვილი, სამხარაძე – უგულავა, მიკუჩაძე