საქართველოს ფეხბურთის ფედერაციის გენერალური მდივანი, დავით მუჯირი ორ კვირიანი შეკრების დაწყებამდე იმ კლუბებს შეხვდა, რომლებიც 2020/2021 წლების სეზონზე ჩვენს ქვეყანას ევროტურნირებზე წარმოადგენენ.
შეხვედრის ფარგლებში სფფ- ს გენერალურმა მდივანმა კლუბებს ევრო ტურნირების გამართვის სავარაუდო სცენარის შესახებ მიაწოდა ინფორმაცია. დღევანდელი მოცემულობით 2020/2021 წლების სეზონის ევროტურნირების დაწყების სავარაუდო თარიღად 25 აგვისტო სახელდება. ამის შესახებ უფრო კონკრეტულად უეფას აღმასრულებელი კომიტეტი 17 ივნისს იმსჯელებს.
ამას გარდა, კლუბებმა კიდევ ერთხელ მიიღეს ინფორმაცია კრისტალბეთ ეროვნული ლიგის განახლების პროტოკოლის შესახებ. სფფ- ს გენერალურმა მდივანმა თითოეულ მათგანს განახლებულ ჩემპიონატში წარმატება უსურვა.
შეგახსენებთ, რომ კრისტალბეთ ეროვნული ლიგის 2020 წლის სეზონი 25 ივნისს განახლდება. საქართველოს ფეხბურთის ფედერაციის ორგანიზებით, ჩემპიონატში მონაწილე ათივე კლუბის წარმომადგენლებს, მატჩების მომსახურე ოფიციალურ პირებსა და მსაჯებს პირველი ტესტირება Covid 19- ზე უკვე ჩაუტარდათ და ყველა ტესტმა უარყოფითი შედეგი აჩვენა. კრისტალბეთ ეროვნული ლიგის განახლებამდე კი ყველა მათგანი განმეორებით ტესტს ჩაიტარებს.
(c) gff.ge