მარტვილის მერანთან ფრედ ნათამაშები შეხვედრის შემდეგ, ჩვენი გუნდის ახალგაზრდა ნახევარმცველს, ჯაბა ჯიღაურს დინამოს ოფიციალური ვებ–გვერდისთვის მცირედი კომენტარის გაკეთება ვთხოვეთ.
ჯაბა ჯიღაური – დღევანდელ შეხვედრაზე განსაკუთრებულს ვერაფერს ვიტყვი. ყველამ კარგად ნახა თუ როგორი თამაში იყო. ირაკლი ძარიას გაგდებამ გადამწყვეტი როლი ითამაშა შეხვედრის შედეგზე. მოსაგები თამაში იყო და დასანანია, რომ ასეთ დაპირისპირებაში მეტად მნიშვნელოვანი ქულები დავკარგეთ. ძალიან რთული არის ათი კაცით თამაში. შეხვედრის მეორე ნახევარში ორივე გუნდს გვქონდა შეხვედრაში გამარჯვების მიღწევის საშუალება, თუმცა შეხვედრა საბოლოოდ ფრედ დასრულდა. ასევე მინდა შევეხო იმ კურიოზულ ბურთს, რომელიც ჩვენს კარში გავიდა – ასეთი დარტყმებიდან ძალიან იშვიათად, ფაქტობრივად არც გადის გოლები, დღეს კი ბურთი ჩვენი კარის ბადეში აღმოჩნდა, ყველაფერთან ერთად დღევანდელ დაპირისპირებაში უიღბლობა ჩვენი მეგზური იყო. მიუხედავად დღევანდელი შედეგისა, მიმაჩნია, რომ ჯერ დაკარგული არაფერია. ჩვენ ჩვენს გასაკეთებელს გავაკეთებთ და ჩემპიონობისთვის უკანასკნელ წუთამდე ვიბრძოლებთ.