ბოლო 8 წლის მანძილზე, დინამო არენაზე სათასო შეხვედრას ჩვენი გუნდი სულ რაღაც მეორედ (მეტოქიდან თუ წილისყრიდან გამომდინარე) ჩაატარებს. 2016 წლის შემდეგ დინამო არენაზე სათასო მატჩი 2022 წელს, გორის დილასთან გავმართეთ და 2-1 მოვიგეთ (უსმანე კამარა, იმრან ულად ომარი).
თავად დავით ყიფიანის სახელობის ტიტულს რაც შეეხება, დედაქალაქელებმა ბოლოს სწორედ 2016 წელს მოიგეს. დინამომ ქუთაისში გამართულ 2015/2016 სეზონის ფინალში ბოლნისის სიონს ვახო ჭანტურიშვილის გოლით 1-0 აჯობა.
სათასო დაპირისპირებაზე კი თბილისელთა და ფოთელთა 5 დუელს ითვლის სტატისტიკა. მთლიანობაში 8 ჩატარებული მატჩი, საიდანაც დინამომ 7 მოიგო, ხოლო კოლხეთმა ერთი. ბურთების ბალანსიც შესაბამისად დედაქალაქელთა მხარესაა 22/5. აღსანიშნავია, რომ 8 მატჩიდან 7 ფოთელებმა უგოლოდ დატოვეს, ხოლო დინამო ხუთივე დუელიდან შემდეგ ეტაპზე გავიდა.
პირველად ამ გუნდების გზები თასის პირველივე გათამაშებაში 1990 წელს გადაიკვეთა. ¼ ფინალში 5 სექტემბერს დინამომ უმასპინძლა კოლხეთს და 3-0 იმარჯვა (ზაზა რევიშვილი, თემურ ქეცბაია, გია გურული), ხოლო ორი კვირის შემდეგ კოლხეთმა 5-4 მოიგო. სწორედ ამ შეხვედრაში გაიტანეს ფოთელებმა გოლები. თბილისელთაგან კი თავი ზაზა რევიშვილმა, თემურ ქეცბაიამ, გიორგი ნემსაძემ და კახა კაჭარავამ გამოიჩინეს.
მეორედ დინამო და კოლხეთის დუელი 1992/1993 სეზონში გაიმართა. მერვედფინალური მატჩი თბილისელებმა დიდი ანგარიშით 7-0 მოიგეს. აღსანიშნავია, რომ დაპირისპირებაში გოლები სამივე არველაძემ გაიტანა (აჩი-2, რეზი-2, შოთი, მიხეილ ყაველაშვილი, გიო ქინქლაძე).
მესამედ მომდევნო სეზონში შეხვდნენ ეს გუნდები ერთმანეთს. ნახევარფინალური მატჩები 14 და 22 აპრილს შედგა. სტუმრად დინამომ ორი უპასუხო გოლით მოიგო, სახლში კი 1-0 ვიმარჯვეთ. სამივე გოლი გელა ინალიშვილის ანგარიშზეა.
მეოთხე პაექრობა 2012/2013 სეზონში შედგა. მერვედფინალში 26 თებერვალს სტუმრად ჩისკოს გოლით 0-1 მოივიგეთ, ხოლო 2 მარტს დინამოზე 3-0 ვიმარჯვეთ (ირაკლი ძარია, გიორგი შაშიაშვილი, ჩისკო).
ბოლოს თასზე კოლხეთს 2015/2016 სეზონის მერვედფინალში, 16 სექტემბერს ვეთამაშეთ. მატჩი დინამომ ჯაბა ჯიღაურის გოლით 1-0 მოიგო.
მთლიანობაში საქართველოს თასზე დინამოელები 188-ე შეხვედრას გამართავენ. დედაქალაქელებმა 120 მატჩი მოიგეს, ხოლო 31 დათმეს. გატანილი და გაშვებული ბურთების ბალანსია 424/123.