სიახლეები

შაბათს 27 აპრილს საქართველოს ჩემპიონატის ოცდამეცხრე ტურის შეხვედრაში, დინამო თბილისი გორში, ადგილობრივ დილას დაუპირისპირდება. დილასთან შეხვედრა თენგიზ ბურჯანაძის სახელობის სტადიონზე 16:00 საათზე დაიწყება.

ეროვნული ასპარეზობის ეგიდით ეს გუნდები ერთმანეთს ორმოცდარვაჯერ შეხვედრიან. შეიძლება ითქვას, რომ დინამოს უპრეცენდენტო უპირატესობა გააჩნია ამ შეხვედრებში. ორმოცჯერ გამარჯვება თბილისელებს დარჩათ, შვიდი შეხვედრა დამთავრდა ფრედ და ერთხელ გორელებმა იზეიმეს წარმატება. გატანილი და გაშვებული ბურთების შეფარდება 139/22 დინამო თბილისის სასარგებლოდ. ყველაზე დიდი ანგარიშით დინამომ 2005 წლის 2 აპრილს იმარჯვა. მეთექვსმეტე ჩემპიონატის ოცდამეექვსე ტურში გამართული შეხვედრა ანგარიშით 9–0 დასრულდა. ასევე ცხრა ბურთი გავიდა 1993 წლის 16 ნოემბერს ჩატარებულ მატჩში. მეხუთე ჩემპიონატის მეთხუთმეტე სათამაშო დღეს თბილისელებმა შვიდი ბურთი შეაგდეს მეტოქის კარის ბადეში, გორელთა ორი გოლის საპასუხოდ. აღსანიშნავია, რომ სამ–სამჯერ დაფიქსირდა ხუთბურთიანი სხვაობა – 6–1 და 5–0, ხოლო ოთხ–ოთხჯერ შეხვედრა დასრულდა ანგარიშით 4–1 და 4–0 . ფრედ ჩატარებული შეხვედრებიდან ხუთი მატჩი უგოლოდ, ხოლო ორი შეხვედრა კი ანგარიშით 2–2 დასრულდა.

ბოლოს დინამო და დილა საქართველოს ჩემპიონატის ოცდამეოთხე ტურში, 17 მარტს დაუპირისპირდნენ ერთმანეთს. შეხვედრა თბილისში, დინამო არენაზე გაიმართა და გატანილი გოლების გარეშე დასრულდა.

სატურნირო ცხრილში ჩვენი გუნდი 66 ქულით პირველ ადგილზე იმყოფება. მას ოთხი ქულით სწორედ ჩვენი მომავალი მეტოქე ჩამორჩება.