22 მაისს ოთხშაბათს, დინამო თბილისი დავით ყიფიანის სახელობის საქართველოს თასის გათამაშების ფინალში იასპარეზებს. ჩვენი გუნდის მეტოქე საჩხერეს ჩიხურა იქნება.მატჩი 18.00 საათზე გაიმართება.
22 მაისს დინამო თბილისმა აქამდე ათი შეხვედრა გამართა საიდანაც ექვსში იმარჯვა, ორი მატჩი ფრედ დაასრულა და ორჯერაც დამარცხდა. ბურთების ბალანსი 24/8. 1991 წელს გალში ადგილობრივ მზიურთან მატჩი უგოლო ყაიმით დასრულდა. 1994 წელს თბილისელებმა ბათუმის ბათუმი სამი უპასუხო გოლით დაამარცხეს. გოლები ანჩაბაძემ, კიკნაძემ და ყაველაშვილმა გაიტანეს. მომდევნო წელს დინამომ წყალტუბოში სამგურალი დაამარცხა დიდი ანგარიშით. 7-0 მოგებულ შეხვედრაში თავის გამოჩენა მოახერხეს: დემეტრაძემ ორჯერ, იაშვილმა, კიკნაძემ, ჯამარაულმა, ყიფიანმა და ცქიტიშვილმა. 1997 წელს ჩვენმა გუნდმა თელავში კახეთი 5-2 დაამარცხა. დემეტრაძის ჰეთ-თრიქს, გოგიჩაიშვილმა დუბლი მიამატა. მომდევნო სეზონში სამგურალის წყალტუბოს ვუმასპინძლეთ და ფრედ 2-2 დავასრულეთ მატჩი. გოლები კიკნაძემ და მაჭავარიანმა გაიტანეს. 2002 წელს ქუთაისში ტორპედომ 1-0 აჯობა დინამოს. 2003 წელს თბილისური დერბი ლოკომოტივთან ლურჯ-თეთრების გამარჯვებით 1-0 დასრულდა. გოლი ალექსიძის ანგარიშზეა. მომდევნო ორი წელი ჩვენი მეტოქე გორის დილა იყო. პირველ შემთხვევაში 2-1 ვაჯობეთ მოწინააღმდეგეს მელქაძის და დვალის გოლებით. მეორე შეხვედრაში კი სამი უპასუხო გოლით დავამარცხეთ გორელები. გოლები მელქაძემ (ორი) და დვალიშვილმა გაიტანეს. 2011 წელს ტორპედომ მოუგო ჩვენს გუნდს 2-1. გოლი ჯიღაურის ანგარიშზეა.
სსრკ- ს ჩემპიონატში 22 მაისს ჩვენმა გუნდმა შვიდჯერ ითამაშა. 3 შეხვედრა თბილისელებმა მოიგეს. ორ-ორჯერ კი ფრედ ითამაშეს და დამარცხდნენ. ბურთების ბალანსი 9/6. 1950 წელს მოსკოვში სპარტაკმა გვიმასპინძლა. შეხვედრა ფრედ 1-1 დასრულდა, გოლი კი თბილისელთა რიგებიდან ვარდიმიადიმ გაიტანა. 1955 წელს მოსკოვის დინამომ დაგვამარცხა 1-0. მომდევნო წელს კიეველ სეხნიებს 3-1 ვაჯობეთ. ორი გოლი ხასაიამ გაიტანა, ერთი კი ზაზროევმა. 1971 წელს გივი ნოდიას გოლით ჩვენმა გუნდმა ვოროშილოვგრადში ადგილობრივი ზარია 1-0 დაამარცხა. 1977 წელს მტკვრისპირელებმა ბაქოს ნეფთჩი მიიღეს და 4-1 აჯობეს. იმ თამაშში ყიფიანმა ორჯერ მოახერხა გოლის გატანა. თითო ბურთი კი შენგელიას და ჩელებაძის ანგარიშზეა. 1985 წელს ერევნის არარატთან მატჩი უგოლოდ დასრულდა. 1988 წელს კი ოდესის ჩერნომორეცმა 2-0 გვაჯობა.