დილით გამართული ვარჯიშის შემდეგ, ავსტრიულ შეკრებაზე ჩვენი გუნდი პირველ სპარინგ შეხვედრას კიევის დინამოსთან გამართავს. გარმიშ–პარტეენკირხენის საფეხბურთო მოედანზე ორი დინამოს სპარინგ მატჩი თბილისის დროით 20:00 საათზე დაიწყება და დაპირისპირების ტექსტური რეპორტაჟის ხილვა ჩვენი კლუბის ოფიციალური ვებ–გვერდის მეშვეობით შეგეძლებათ.
საბჭოთა კავშირისა და უკრაინის ჩემპიონატის ყველაზე ტიტულოვანი კლუბი, კიევის დინამო ოფიციალურად 1927 წლის 13 მაისს დაარსდა. გუნდის ოფიციალური ფორმები ლურჯ–თეთრ ფერებში არის გადაწყვეტილი. დინამო კიევის მთავარი მწვრთნელი წარსულში წარმატებული და ტიტულოვანი ფეხბურთელი, ევროპის 1975 წლის საუკეთესო ფეხბურთელი – ოქროს ბურთის მფლობელი. უკრაინის დამსახურებული მწვრთნელი – ოლეგ ბლოხინი არის.
კიეველმა თანაკლუბელებმა პირველი ოფიციალური მატჩი 1928 წლის 17 ივლისს ოდესის დინამოსთან გამართეს და ფრედ – 2:2 ითამაშეს.
საბჭოთა კავშირის საფეხბურთო ჩემპიონატი კიევის დინამომ 13–ჯერ მოიგო და ამ მაჩვეენებლით გათამაშების რეკორდის მფლობელიც გახდა. უკრაინულმა გუნდმა საბჭოთა კავშირის თასის გათამაშება 9 შემთხვევაში ტრიუმფით დაასრულა. დამოუკიდებელი უკრაინის საფეხბურთო ჩემპიონატი დინამო კიევს ყველაზე მეტჯერ, 13–ჯერ აქვს მოგებული. კიევის დინამომ ქვეყნის თასის გათამაშებაზე 9–ჯერ იმარჯვა, 4–ჯერ დაეუფლა სუპერთასს.
ჩვენმა მომავალმა სპარინგ მეტოქემ 1975 და 1986 წლებში უეფას თასების მფლობელთა თასის გათამაშებაზე იმარჯვა, 1975 წელს კი უეფას სუპერთასი მოიგო
დინამო თბილისი კიევურ გუნდს დღემდე 106 ოფიციალურ მატჩში (საბჭოთა კავშირის ჩემპიონატი და თასისი გათამაშება) შეხვედრია. 35 მატჩი ჩვენმა გუნდმა მოიგო, 36 შემთხვევაში თამაში ფრედ დასრულდა, 35 შეხვედრაში კი კიევის დინამომ იმარჯვა. ბურთების შეფარდება კი ჩვენი გუნდის სასარგებლოდ 147:137–ზე არის.
თბილისური და კიევური დინამოების დაპირისპირების ისტორიაში ყველაზე პოპულარული ანგარიში 1:1 გახლავთ. მსგავსი რეზულტატი 17 შემთხვევაში დაფიქსირდა.
ავსტრიულ შეკრებაზე მყოფი კიევის დინამო თავდასხმის ხაზში კიდევ უფრო გაძლიერდა. გუნდს შეურთდა ჰოლანდიურ პსვ ეინდჰოვენში მოთამაშე 25 წლის ფორვარდი – ჯერმეინ ლენსი, რომლის სანაცვლოად უკრაინულმა კლუბმა 9 მილიონი ევრო გადაიხადა.
ჩვენი გუნდის მსგავსად კიევის დინამოც ახალი სეზონისთვის ემზადება. უკრაინის დასრულებულ ჩემპიონატში ჩვენმა მომავალმა სპარინგ მეტოქემ 30 ჩატარებულ შეხვედრაში 62 ქულა მოაგროვა, მესამე საფეხური დაიკავა და ევროპის ლიგის გათამაშების ფლეი–ოფში თამაშის უფლება მოიპოვა.