სიახლეები

საქართველოს XXVI ეროვნული ჩემპიონატის უმაღლესი ლიგის მეცხრე ტურის შეხვედრაში ჩვენი გუნდი ვიტ ჯორჯიას დაუპირისპირდება. 18 ოქტომბერს მცხეთა პარკზე ვეტერინართა და დინამოელთა დაპირისპირება 15.00 საათზე დაიწყება. ჩვენი კლუბის ოფიციალური ვებ–გვერდი ტრადიციულად შეხვედრის ვიდეო და ტექსტურ რეპორტაჟს შემოგთავაზებთ.

ჩვენი მეტოქე

საფეხბურთო კლუბი ვიტ ჯორჯია საქართველოს ჩემპიონატში 1997/1998 წლების სეზონში გამოჩნდა. გუნდის სიმბოლიკა ძირითადად მწვანე და თეთრ ფერებში არის გადაწყვეტილი. ვიტ ჯორჯია საშინაო მატჩებს მცხეთაში, მცხეთა პარკზე მართავს, რომელიც 2000 მაყურებელს იტევს. 1997 წლის მიწურულს შექმნილმა კლუბმა უმაღლეს ლიგაში მოასპარეზე მორკინალი ჩაანაცვლა. ქართულ საფეხბურთო ელიტაში მოხვედრიდან სამი წლის შემდეგ გუნდმა პირველი მედლების მოპოვებაც მოახერხა, გუნდმა 1999/2000 წლების სეზონში საქართველოს ჩემპიონატში მეორე პოზიცია დაიკავა და ვეტერინარები ვერცხლის მედლებს დაეპატრონენ. მას შემდეგ 10 წლის განმავლობაში ვიტ ჯორჯია სტაბილურად ახერხებდა ევროთასებზე გამსვლელი საგზურის მოპოვებას. ვეტერინარებმა ევროტურნირებზე უკანასკნელად 2010/2011 წლების სეზონში იასპარეზეს. უეფას ევროპის ლიგის გათამაშებაზე ჩვენი მომავალი მეტოქე ჩეხურ ბანიკ ოსტრავას დაუპირისპირდა და ორი მატჩის ჯამში ანგარიშით – 0:6 დამარცხდა. ვიტ ჯორჯიამ ისტორიაში დიდ წარმატებას 2003/2004 წლების სეზონში მიაღწია, გუნდმა საქართველოს ჩემპიონატი ტრიუმფით დაასრულა და თავისი პირველი ტიტული მოიპოვა. ვეტერინარებმა ანალოგიური შედეგი 2008/2009 წლების სეზონში გაიმეორეს და საქართველოს ჩემპიონის წოდებას მეორედ დაეუფლნენ. 2009/2010 წლების სეზონში ვიტ ჯორჯიამ საქართველოს დავით ყიფიანის სახელობის თასის გათამაშებაზე იმარჯვა. დინამო არენაზე გამართულ ფინალურ მატჩში, რომელსაც 12 000 მაყურებელი ესწრებოდა, ერთმანეთს ჩვენი გუნდი და ვიტ ჯორჯია დაუპირისპირდნენ. ფინალური შეხვედრა დინამოელებმა მინიმალური ანგარიშით – 0:1 წააგეს. 2009 წელს საქართველოს სუპერთასისთვის ბრძოლაში დინამოელთა და ვეტერინართა გზები გადაიკვეთა. რუსთავში, ფოლადის სტადიონზე საქართველოს თასის მფლობელი დინამო თბილისი ჩემპიონ ვიტ ჯორჯიას დაუპირისპირდა. მატჩის ძირითადი დრო ფრედ – 1:1 დასრულდა, 15 წუთიან დამატებით ტაიმებში კი ვეტერინარებმა გოლის გატანა შეძლეს.

მწვრთნელი და ვიტ ჯორჯია

ვიტ ჯორჯიელთა მთავარი მწვრთნელი 2013 წლის აპრილიდან ზურაბ ბერიძე გახლავთ. 2012/2013 წლების სეზონის პირველ ეტაპის შემდეგ, ვიტ ჯორჯიამ გათამაშების მეორე ნახევარი ქვედა ექვსეულში გაატარა. გასავარდნ ზონაში მყოფი ვიტ ჯორჯია ზურაბ ბერიძემ ჩაიბარა და მასთან ერთად გუნდი საფეხბურთო ელიტაში დარჩა. გასული სეზონი ვეტერინარებმა მერვე ადგილზე დაასრულეს. წელს კი გუნდს 8 შეხვედრაში 10 ქულა აქვს დაგროვილი და გათამაშების ცხრილში მერვე ადგილზე იმყოფება.

დინამომდე

გათამაშების პირველ ტურში ვიტ ჯორჯიამ მარტვილის მერანს აჯბა 2:0, რასაც სამტრედიასთან მინიმალური ანგარიშით 0:1 მარცხი მოჰყვა. საქართველოს თასის 1/16 ფინალის პირველ დაპირისპირებაში ვეტერინარებმა 4:2 მოუგეს გაგრას. შემდეგ საშინაო მარცხი ცხინვალის სპარტაკთან 0:1 და გამარჯვება ბათუმის დინამოსთან ორი უპასუხო ბურთით. ამას მოჰყვა მარცხი ტორპედოსთან 0:1 და 3:1 გამარჯვება ზუგდიდთან. მეშვიდე ტურში ვიტ ჯორჯიამ ფრედ 2:2 ითამაშა გურიასთან და თასის საპასუხო მატჩში კიდევ ერთხელ აჯობა გაგრას. ამჯერად 2:1. ბოლოს ჩვენი მომავალი მეტოქე ჩიხურას დაუპირისპირდა და 0:2 დამარცხდა.

ვიტ ჯორჯია VS დინამო

აღსანიშნავია, რომ მომავალი დაპირისპირება ვიტ ჯორჯიასა და დინამოს შორის საიუბილეო, 50 - ე იქნება. ამ გუნდებს შორის ჩატარებული შეხვედრები ყოველთვის გამოირჩევა დაძაბულობით და პრინციპულობით, რაზეც სტატისტიკაც მეტყველებს (შეიძლება ითქვას, რომ ვიტ ჯორჯია დინამოსთვის ერთ-ერთი ყველაზე უხერხული მეტოქეა). 49 ჩატარებულ შეხვედრაში 18 მატჩი დინამომ მოიგო, 12 შემთხვევაში იმარჯვა ვიტ ჯორჯიამ და 19 თამაში საყაიმო ანგარიშით დასრულდა. ბურთების შეფარდება დინამოს სასარგებლოდ არის- 60/40. აღსანიშნავია, რომ 10 შემთხვევაში უგოლო ფრე დაფიქსირდა, 1:0  კი, ყველაზე პოპულარული ანგარიშია. ამ შედეგით 12 მატჩი დასრულდა. ოთხბურთიანი სხვაობით დინამომ 2000 წლის 25 ნოემბერს იმარჯვა. მეთორმეტე ჩემპიონატის მეთხუთმეტე ტურში ჩატარებული მატჩი ჩვენმა გუნდმა ოთხი უპასუხო ბურთით მოიგო. დიდი სხვაობით, კი დინამო 2001 წლის 17 ნოემბერს, მეცამეტე ჩემპიონატის მეთექვსმეტე სათამაშო დღეს საკუთარ სტადიონზე ანგარიშით 2:5 დამარცხდა.

უკანასკნელი მატჩი, რომელიც დინამოსა და ვიტ ჯორჯიას შორის 15 დეკემბერს დინამო არენაზე გაიმართა, ჩვენი სტუმრების გამარჯვებით, ანგარიშით 0:1 დასრულდა.

დისკვალიფიცირებული ფეხბურთელები

ხვალინდელ შეხვედრას ორივე გუნდი დისკვალიფიცირებული ფეხბურთელების გარეშე ხვდება.

ვიტ ჯორჯია VS დინამო – მსაჯი

საქართველოს XXVI ჩემპიონატის მეცხრე ტურის შეხვედრას, რომელსაც ჩვენი გუნდი 18 ოქტომბერს მცხეთაში, მცხეთა პარკზე ვიტ ჯორჯიას წინააღმდეგ გამართავს– არსენ ნონიკაშვილი განსჯის. მას ასისტენტობას ზ. ფიფია და ა. ჟივაძე გაუწევენ. სათადარიგო მსაჯის ფუნქციებს კი ჯ. ხორავა შეასრულებს.

ჩვენი გუნდის მონაწილეობით არსენ ნონიკაშვილმა ბოლოს ამა წლის 17 მაისს იმსაჯა. დინამო თბილისმა რუსთავის მეტალურგი 2:0 დაამარცხა. აღნიშნულ მატჩში არსენ ნონიკაშვილს ფეხბურთელები არ გაურთხილებია.

უკანასკნელი შეხვედრა, რომელიც არსენ ნონიკაშვილმა იმსაჯა 7 ოქტომბერს პირველ ლიგაში გამართული საპოვნელა 0:1 ბეთლემი გახლავთ. აღნიშნულ მატჩში ნონიკაშვილმა ფეხბურთელები სამჯერ გააფრთხილა და ერთიც წითელი ბარათი აჩვენა.

ვიტ ჯორჯიას სავარაუდო შემადგენლობა

ჩვენი ვარაუდით, ხვალინდელ მატჩში ვიტ ჯორჯიას სასტარტო შემადგენლობა ასეთი იქნება:

შეროზია – საბაძე, გეთიაშვილი, მურუსიძე, კალანდია – დავლაშელიძე, კურდღელაშვილი, მაისურაძე, დადიანი – ლობჯანიძე, კუხალეიშვილი