20 მარტს დავით ყიფიანის სახელობის საქართველოს თასის გათამაშების 1/4-ფინალის საპასუხო მატჩები გაიმართა. დღის ბოლოს "დინამო არენაზე" გამართულ შეხვედრაში თბილისის "დინამომ" რუსთავის "მეტალურგს" შანსი არ დაუტოვა - 4:1.

შეგახსენებთ, რომ ამ გუნდების პირველი დაპირისპირებაც "დინამოს" გამარჯვებით (2:0) დასრულდა.

ანგარიში უკვე მესამე წუთზე თორნიკე გორგიაშვილმა გახსნა. მე-16 წუთზე სხვაობა ორ ბურთამდე გიორგი მერებაშვილმა თერთმეტმეტრიანით გაზარდა, ტაიმის დასრულებამდე კი სტუმართა კარი მესამედ ჩისკომ (39-ე წუთი) დალაშქრა.

შესვენების შემდეგ, თამაშის განახლებიდან 2 წუთში რუსთაველები უკვე დარკო გლიშიჩმა დაამწუხრა - 4:0.

59-ე წუთზე ბესიკ ჩიმაკაძემ პრესტიჟის გოლი გაიტანა და როგორც აღმოჩნდა, მატჩის საბოლოო ანგარიში დააფიქსირა - 4:1.

შეგახსენებთ, რომ მანამდე გამართულ შეხვედრებში ნახევარფინალების საგზურები საჩხერის "ჩიხურამ" და გორის "დილამ" მოიპოვეს, მარტვილის "მერანსა" და ქობულეთის "შუქურას" შორის მატჩი კი სამტრედიის სტადიონზე მომხდარი ინციდენტის გამო შეწყდა.

სპორტალი  20.03.2014