დღეს საქართველოს 19 წლამდელთა ნაკრებმა ბულგარეთის 19 წლამდელთა ნაკრები მიიღო და გატანილი გოლების გარეშე დასცილდა. ამხანაგურ შეხვედრას ვიტალი დარასელიას სახელობის დინამოს აკადემიამ უმასპინძლა. მატჩი, რომელიც ქარისა და თოვლის თანხლებით მიმდინარეობდა, გარდამავალი უპირატესობით და მწირი საგოლე მომენტებით წარიმართა. გიორგი ყიფიანის გუნდის სასტარტო შემადგენლობაში სამმა დინამოელმა- რომან ჩაჩუამ, ლუკა ლოჩოშვილმა და ბექა მიქელთაძემ ითამაშა. შეცვლაზე კი დავით კობოური, ნიკოლოზ ბაშალეიშვილი, ლუკა ფოჩხუა და ენვერ ლილუაშვილი შევიდნენ.