27 დეკემბერს, სასტუმრო პულმანში, საქართველოს ფეხბურთის ფედერაციის ყოველწლიური დაჯილდოება, GFF Awards 2024 გაიმართა. GFF Awards 2024 ნომინაციებში რჩეულთა გამოსავლენად გამოკითხვაში მონაწილეობა ვეტერანმა ფეხბურთელებმა, სპორტულ ჟურნალისტთა ასოციაციის წარმომადგენლებმა, ქალთა ლიგის და ფუტსალის ლიგის კლუბების წარმომადგენლებმა მიიღეს.
გამარჯვებულებისთვის სპეციალური ჯილდოები კოკა-კოლა ბოთლერს ჯორჯიამ დააწესა. კომპანიის გადაწყვეტილებით, ალექსანდრე ჩივაძის სახელობის 17 და 19 წლამდე ოქროს, ვერცხლის და ბრინჯაოს მედლის მფლობელებს გადაეცათ ფულადი ჯილდო 3, 5 და 10 ათასი ლარის ოდენობით.
ალექსანდრე ჩივაძის პრიზი 17 წლამდე ფეხბურთელებისთვის - სამივე სინჯის მედალი დინამოელებმა მოიპოვეს: ბრინჯაო - მათე შათირიშვილი, ვერცხლი - ანდრია ბართიშვილი, ოქრო - საბა ხარებაშვილი.
ალექსანდრე ჩივაძის პრიზი 19 წლამდე ფეხბურთელებისთვის - ასევე სამივე სინჯის მედალი მოიპოვეს დინამოელებმა: ბრინჯაო - ცოტნე ბერელიძე, ვერცხლი - ვახტანგ სალია, ოქრო - საბა სამუშია.