საქართველოს 17 წლამდელთა ნაკრები ბელარუსში უეფას განვითარების თასზე ასპარეზობდა. ჭაბუკმა ჯვაროსნებმა სამი მატჩი ჩაატარეს და სამივეში მატჩისშემდგომი პენალტების სერიით იმარჯვეს. პირველი შეხვედრა მოლდოვასთან 0:0 დასრულდა, ხოლო თერთმეტმეტრიანებში საქართველომ 5:3 იმარჯვა. მეორე მატჩში გიორგი ნემსაძის გუნდი მასპინძლებს, ბელორუსიის ნაკრებს დაუპირისპირდა და ფრედ 1:1 დასრულებული ძირითადი დროის შემდეგ, პენალტების სერიაში 5:3 აჯობა მეტოქეს. მესამე და გადამწყვეტი პაექრობა საქართველოსა და ლატვიას შორის გაიმართა. ძირითადი დრო აქაც ყაიმით 1:1 მორჩა, პენალტები კი ჯვაროსნებმა უკეთ შეასრულეს და 6:5 მოიგო. ბელორუსთან და ლატვიასთან გოლები დინამოელმა ხვიჩა კვარაცხელიამ გაიტანა. ნაკრებში დინამო თბილისიდან მის გარდა ჩარკვიანი, მოისწრაფიშვილი, დავითაშვილი (კაპიტანი), მექვაბიშვილი, აზაროვი, იაკობიძე, ჯანგველაძე, ხარშილაძე და ჯანგიძე არიან გამოძახებულნი.