დღეს დინამო თბილისის პირველი საჩემპიონო თაობის შეტევების ორგანიზატორი - ვლადიმერ ბარქაია 82 წლის გახდა. მაღალი ტექნიკით დაჯილდოებული შემტევი 1937 წელს გაგრაში დაიბადა. 1957-1967 წლებში ასპარეზობდა დინამოში. 297 ჩატარებულ შეხვედრაში ბარქაიამ 108- ჯერ დალაშქრა მეტოქეთა კარი. არის სსრკ- ს 1964 წლის ჩემპიონი. ორგზის პრიზიორი 1959 და 1962 წლებში. 1964 წელს მეორე ნომრად დაასახელეს საუკეთესო 33 ფეხბურთელში. სსრკ- ს ნაკრებში ჩაატარა 2 მატჩი (დანიის და ბრაზილიის წინააღმდეგ) და გაიტანა 2 გოლი. 1967-1969 წლებში იყო დინამო თბილისის მწვრთნელი. დინამოელები ვულოცავთ ბატონ ვლადიმერს იუბილეს. ვუსურვებთ ჯანმრთელობას და დღეგრძელობას.